success

“သင်မကြိုက်တဲ့ အခြေအနေတစ်ခုကို သည်းခံနေရတာတွေ ရပ်ချိန်တန်ပါပြီ”

 

လုပ်ငန်းက ဝင်ငွေမကောင်းသလို မတိုးတက်ဘူး။ ပြိုင်ဖက်တွေက များလာတယ်။ အလုပ်မှာ အဆင်မပြေဘူး။ လစာမတိုးတာ ကြာပြီ။ တခြားသူတွေသာ ရာထူးတိုးသွားတယ်။ ငါကျတော့ မတိုးဘူး။ အလုပ်ကလူတွေနဲ့ ဆက်ဆံရတာလည်း အဆင်မပြေဘူး။ မန်နေဂျာကလည်း တော်တော်ရင့်တယ်။

နာမည်ကြီး ပစ္စည်းကောင်းကောင်းတွေ ဝယ်ချင်တယ်။ နိုင်ငံခြား ခရီးမပြောနဲ့ ပြည်တွင်းမှာတောင် မသွားနိုင်ဘူး။ စိတ်ကူးပဲ ရှိတယ်။ ပိုက်ဆံက မရှိဘူး။

အိမ်ထောင်ရေး/ အချစ်ရေး အဆင်မပြေဘူး။ ချစ်သူ အိမ်ထောင်ဘက်က သူ့ဆန္ဒကြီးပဲ။ လေ့လာသင်ယူမှုလည်း မရှိဘူး။ ပြောရင်လည်း မကြိုက်ဘူး။ ဒေါသလည်း ကြီးတယ်။ Negative ကလည်း တော်တော်များတယ်။ ပျော်စရာ မကောင်းဘူး။

လမ်းပျောက်နေသလိုဖြစ်နေတယ်။ အခုလုပ်နေတဲ့အလုပ်ကို မကြိုက်ဘူး။ ဘာလုပ်ရမလဲဆိုတာလည်း မသိဘူး။ ဘဝ အဓိပ္ပာယ်မရှိသလို ဖြစ်နေတယ်။ စိတ်မချမ်းသာဘူး။ လူတွေနဲ့လည်း ဆက်ဆံရေး အဆင်မပြေဘူး။ ငါ့ကို ဘယ်သူမှ နားမလည်ပေးကြဘူး။

ဒါပေမယ့် မေးစရာရှိတာက ဒီအတိုင်းပဲ နေသွားတော့မှာလား။ နေသွားဖို့ ဆုံးဖြတ်လိုက်ပြီလား။ အဲဒါဆိုရင်တော့ လူဖြစ်ရှုံးခြင်းလို့ပဲ သတ်မှတ်ရတော့မယ်။

သင်မှတ်ထားရမှာက အခက်အခဲတွေဆိုတာ သင်တစ်ယောက်တည်း ရှိနေတာ မဟုတ်ဘူး။ အရေးကြီးတာက ပြောင်းလဲဖို့ပဲ။ ပိုပြီးအရေးကြီးတာက သင့်မှာ ပြောင်းလဲချင်စိတ်ရှိသလားဆိုတာပဲ။ အခြေအနေတစ်ခုကို မကြိုက်ရင် ပြောင်းလဲပါ။ သင်ဟာ သစ်ပင်မဟုတ်ဘူးလို့ Jim Rohn က ပြောတယ်။

ခွေးဆိုတာက မွေးကတည်းက ခွေးပဲ။ ဘာမှ ပြောင်းလဲလို့ မရဘူး။ ကြောင်ဟာလည်း ကြောင်ပဲ။ ဘာမှပြောင်းလဲလို့ မရဘူး။

ဒါပေမယ့် သင်ကကျတော့ လူ။ လူဆိုတာ စဉ်းစားနိုင်တယ်။ သင်ယူနိုင်တယ်။ ပြောင်းလဲနိုင်တယ်။ သင်အခု အဆင်မပြေဘူးဆိုတာ သင်တွေးပုံခေါ်ပုံ လုပ်ပုံ ကိုင်ပုံတွေ လိုအပ်နေလို့ ဖြစ်နိုင်တယ်။ ဆင်ခြေတွေကို စွန့်လွှတ်ရမယ်။ အတွေးအခေါ်တွေ ပြောင်းရမယ်။ ဘယ်နေရာမှာ ငါသိဖို့ လိုနေသလဲဆိုတာကို သိအောင်လုပ်ရမယ်။

သင်လိုချင်တဲ့အရာတွေကို ရအောင် မလုပ်ရင် မလိုချင်တာတွေနဲ့ တစ်သက်လုံးနေသွားရမယ်။ အကန့်အသတ်တွေက သင့်ကို တားဆီးမှာကို လက်မခံပါနဲ့။ သာမန်ဘဝဟာ ပျော်စရာ မကောင်းဘူး။ သင် ဒီထက်မက လုပ်နိုင်ပါတယ်။ ဘယ်သူမဆို ပြောင်းလဲနိုင်တယ်။

သူ့ကိုယ်သူတင်မကပဲ ပတ်ဝန်းကျင်ကိုပါ တိုးတက်ပြောင်းလဲနိုင်စေတဲ့ လူသားတစ်ယောက် ဖြစ်နိုင်တယ်။ အဲဒါ ကျွန်တော်လက်ခံထားတဲ့ ယုံကြည်မှုဖြစ်တယ်။ အဲဒီယုံကြည်မှုကို ကျွန်တော်ဆုပ်ကိုင်ထားတယ်။

 

 

Leave a Comment