success

ဘဝမှာ ရှေ့ဆက်ဘာလုပ်ရမှန်းမသိဘဲ့ လမ်းပျောက်နေတဲ့သူတွေ ဖတ်ဖို့

Unicode Version

 

လူတိုင်းက ရည်မှန်းချက်ကိုယ်စီနဲ့ကြိုးစားနေကြတဲ့ အချိန်မှာ ကိုယ်တစ်ယောက်တည်း ဘဝကြီးကိုငြီးငွေ့ပြီး ဘာလုပ်လို့လုပ်ရမှန်းမသိ လမ်းပျောက်နေသလိုမျိုး ဖြစ်ဖူးပါသလား?? ဒါဆိုရင်တော့ ဒီလိုအချိန်ဟာ ဘယ်လောက်ခက်ခဲတယ်ဆိုတာ သင်ကောင်းကောင်း နားလည်မှာပါ။ ဘာလုပ်ရမှန်းမသိ၊ ဘာမှလည်းမလုပ် ချင်ဘူးဆိုတဲ့စိတ်မျိုးဖြစ်နေတဲ့အခါမှာ ဒီအချက်လေး တွေကို လုပ်ပေးမယ်ဆိုရင် လမ်းပျောက်နေတဲ့အခြေအနေကနေ ပြန်ပြီးအဆင်ပြေလာမှာပါ။

၁။ သင့်ကိုစိတ်ဖိစီးစေတဲ့ ပတ်ဝန်းကျင်ကိုရှောင်ပါ

ကိုယ်တိုင်က ရှေ့ဆက်ဘာလုပ်ရမယ်မှန်းမသိ ရည်မှန်းချက်ပျောက်နေချိန်မှာ စိတ်ဖိစီးမှုတွေထပ်ဖြစ်လာမယ်ဆိုရင် အခြေအနေက ပိုဆိုးသွားပြီး ထစ်ခနဲရှိစိတ်တိုဒေါသထွက်တတ်တဲ့သူ တစ်ယောက် ဖြစ်သွားနိုင်ပါတယ်။ ဒါကြောင့် ဒီလိုဖြစ်နေပြီဆိုရင် ကိုယ့်ကိုစိတ်ဖိစီးစေတဲ့ပတ်ဝန်းကျင်ကို ရှောင်ပြီး တစ်ယောက်တည်းအေးအေးဆေးဆေး နေနိုင်အောင်ကြိုးစားပါ။ ခရီး လေးဘာလေး ထွက်သင့်ရင်ထွက်ပါ။ ခရီးမထွက်နိုင်ဘူး၊ တစ်ယောက်တည်းနေဖို့လည်း အဆင်မပြေဘူးဆိုရင်တော့ ပိတ်ရက်၊အားလပ်ရက်တွေမှာ တစ်ယောက်တည်း အေးအေးဆေးဆေးအပြင်ထွက်လမ်း လျှောက်တာ၊ လူရှင်းတဲ့ကော်ဖီဆိုင်မှာထိုင်တာ၊ တိတ်ဆိတ်တဲ့နေရာလေးမှာ စာအုပ်ဖတ်တာမျိုး လုပ်ပေးပါ။ ကိုယ့်ကို စိတ်ပျော်ရွှင်စေတဲ့သူတွေ နားမှာနေပါ။

၂။ စိတ်ပျော်ရွှင်စေမယ့်အရာတွေကိုလုပ်ပါ

 

သင့်အနေနဲ့ ဒီလိုအခြေအနေမှာ ကိုယ်ဖြစ်ချင်တာကို လုပ်ရမလား၊ ဖြစ်သင့်တာကိုပဲလုပ်ရမလားဆိုပြီး ဝေခွဲရခက်၊ စဉ်းစားရခက်နေတတ်ပါတယ်။ လက်ရှိ သင်တွေးနေတဲ့ အတွေးတွေအားလုံးကိုခေါင်းထဲက ထုတ်လိုက်ပါ။ အခုအချိန်မှာ သင့်အနေနဲ့ သင့်ကို စိတ်ပျော်ရွှင်စေတဲ့ အလုပ်မျိုးကိုလုပ်တာ အကောင်းဆုံးပါ။ သင့်ကိုပျော်ရွှင်စေတဲ့အလုပ်က ဘယ်အရာဖြစ်မလဲ စဉ်းစားပါ။ အဲ့ဒီကမှ သင်နဲ့သင့်တော်တဲ့အရာကို တွေ့လာပါလိမ့်မယ်။

၃။ လွန်ခဲ့တဲ့(၅)နှစ်တုန်းက အချိန်နဲ့အခုလက်ရှိအချိန်ကို နှိုင်းယှဉ်ကြည့်ပါ

စိတ်ဓာတ်ကျနေတာပဲဖြစ်ဖြစ်၊ ရည်မှန်းချက်ပျောက်ပြီး လမ်းပျောက်နေတာပဲဖြစ်ဖြစ် ဒီလိုအခြေအနေမှာ သင့်အတွက်အကောင်းဆုံးက လွန်ခဲ့တဲ့(၅)နှစ်ကသင်နဲ့ အခုလက်ရှိသင့်အနေအထားကို ယှဉ်ကြည့်တာပါပဲ။ ဒီ(၅)နှစ်အတွင်းမှာ ဘယ်အရာတွေတိုးတက်လာသလဲ၊ ဘယ်အရာတွေဆုတ်ယုတ်သွားသလဲဆိုတာ ပြန်ဆန်းစစ်ပါ။ တိုးတက်လာတဲ့အချက်တွေအတွက် ကိုယ့်ကိုယ်ကို ချီးကျူးပါ။ ပြီးရင် ဆုတ်ယုတ်သွားတဲ့အချက်တွေကို ပြုပြင်ပါ။ ဒါက သင့်ကိုစိတ်ဓာတ်တက်ကြွစေပါလိမ့်မယ်။

၄။ အလွန်အမင်း စိုးရိမ်တတ်တဲ့စိတ်ကိုပြုပြင်ကြည့်ပါ

ရည်မှန်းချက်မရှိသလို လမ်းပျောက်နေတယ်ဆိုတာ စိုးရိမ်စိတ်လွန်ကဲခြင်းကတဆင့် ဖြစ်ပေါ်လာတဲ့ အခြေအနေ တစ်ခုဖြစ်ပါတယ်။ စိုးရိမ်စိတ်လွန်ကဲပြီးအတွေးလွန်ခြင်းက သင့်ကို ဘာမှမလုပ်ချင်၊မကိုင်ချင်ဘဲ အရှုံးပေးချင်စိတ်ကို ဖြစ်စေပါတယ်။ ဒါကြောင့် အဲ့ဒီလို အလွန်အမင်းတွေးပူတတ်တဲ့အကျင့်၊ စိုးရိမ်တတ်တဲ့အကျင့်ကိုပြင်ကြည့်ပါ။ ပြုပြင်ရင်း အဖက်ဖက်ကအဆင်ပြေ လာပါလိမ့်မယ်။

Credit: Original Writer
Sharing By: #One daily Media

Leave a Comment