Daily News

လွန်ခဲ့တဲ့ (၁၅)နှစ်က ဓာတ်ပုံအတူ ရိုက်ခဲ့ဖူးသူနှစ်ဦးရဲ့ ထူးဆန်းလွန်းတဲ့ ကံတရား

လူတွေရဲ့ကံကြမ္မာဟာ တစ်ဦးနဲ့တစ်ဦး မတူနိုင်ပါဘူး။ ဒါပေမယ့် တစ်ခါတလေမှာလည်း ထူးဆန်းတဲ့ တိုက်ဆိုင်မှုတွေဆိုတာ လူတစ်စုတစ်ဖွဲ့တည်းမှာ ပြိုင်တူဖြစ်လာတာမျိုး ရှိတတ်ပါတယ်။ ဥပမာအားဖြင့် တစ်လှေတည်းလှော်၊ တစ်ခရီးတည်းသွားသူတွေ ဘေးဒုက္ခသင့်တာမျိုးပေါ့။ ဒီမှာ ကံကောင်းသူတွေက အသက်ရှင်ကြတယ်။ ကံဆိုးသူတွေက အသက်သေကြတယ်။ မိသားစုဝင်အချင်းချင်းမှာတောင် ကံတရားက တစ်ဦးနဲ့တစ်ဦး မတူနိုင်ကြပါဘူး။

အခုလည်း အသက်(၂၀)အရွယ် ကောင်းလေးတစ်ယောက်ဟာ သူ့အသက် (၅)နှစ်သားတုန်းက လေယာဉ်မယ်တစ်ဦးနဲ့ အမှတ်တရ ဓာတ်ပုံရိုက်ခဲ့တာကို ပြန်လည်မျှဝေခဲ့ပါတယ်။ သူ ပထမဆုံး လေယာဉ်စစီးဖူးစဉ်က ဆိုပါတော့။ မိဘတွေက အမှတ်တရ သဘောနဲ့ ဓာတ်ပုံ ရိုက်ပေးခဲ့တာပါ။

နောက်ထပ်(၁၅)နှစ်ကြာတော့ လေယာဉ်မယ်နဲ့ ကောင်လေးတို့ ပြန်ဆုံကြပါတယ်။ ကောင်လေးနာမည်ကတော့ Xu Yang Feng ဖြစ်ပြီး အခုအချိန်ထိ သူ့ပထမဆုံးလေယာဉ်ခရီးစုဉ်ကို အမှတ်ရနေပါသတဲ့။ အခု အဲဒီ လေယာဉ်မယ်နဲ့ သူ ကံဆုံလို့ ပြန်ဆုံခွင့်ရခဲ့ပါတယ်။ အလွန်ထူးဆန်းတဲ့ တိုက်ဆိုင်မှုပါ။ ပိုပြီး ထူးဆန်းတာက ဝါရင့်လေယာဉ်မယ်ကြီးနဲ့ သူဟာ လုပ်ဖော်ကိုင်ဘက်တွေ ဖြစ်နေတာပါဘဲ။

Xu ဟာ တရုတ်နိုင်ငံ၊ Civil Aviation Flight Academy မှ တတိယနှစ်ကျောင်းသားဖြစ်ပါတယ်။ သူဟာ လက်တွေ့လုပ်ငန်းခွင် ဝင်ရောက်မှုအဖြစ် ယခုနှစ် အောက်တိုဘာလမှာ China Eastern Airlines လေကြောင်းလိုင်းမှာ စတင် တာဝန်ထမ်းဆောင်ရပါတယ်။ အဲဒီမှာ သူ့ရဲ့စံပြလေယာဉ်မယ်ကြီးကို စီနီယာအဖြစ် ပြန်ဆုံခဲ့ရတာပါ။ ဒီလို အဖြစ်မျိုး Xu က ဘယ်လိုမှ မတွေးခဲ့မိပါဘူးတဲ့။

လေယာဉ်မယ်ရဲ့အမည်ကတော့ Fang လို့ သိရပါတယ်။ သူမကလည်း လွန်ခဲ့တဲ့ (၁၅)နှစ်က ဓာတ်ပုံအတူတူ တွဲရိုက်ခဲ့တဲ့ Xu ကို ကောင်းကောင်းသတိရနေတယ်လို့ ဆိုပါတယ်။ အခုလို ထင်မှတ်မထားတဲ့ပုံစံနဲ့ ပြန်ဆုံကြတော့ Xu နဲ့ Fang တို့ဟာ ဓာတ်ပုံအသစ်တွေ ပြန်လည်ဖန်တီးခဲ့ကြပါတယ်။ ကွာခြားတာက Xu တစ်ယောက် သူလည်း လူကြီး ဖြစ်နေပြီဆိုတာပါဘဲ။

လေကြောင်းလိုင်းကလည်း ဒီလို ကြည်နူးဖွယ်ရာ တိုက်ဆိုင်မှုကို သိရှိခဲ့တာကြောင့် Xu ရဲ့ အလုပ်သင်ကာလကို ဒီလေကြောင်းမှာပဲ ဆက်လက်ထားရှိဖို့ ဆုံးဖြတ်ခဲ့ကြောင်း Beijing Youth Paper Daily ဖော်ပြချက်အရ သိရပါတယ်။ သူ့ကို ကြီးကြပ်ရမှာတော့ ဝါရင့်လေယာဉ်မယ်ကြီး Fang သာဖြစ်ပြီး Xu အနေနဲ့ ပိုကောင်းတဲ့ အရည်အချင်းတွေ သင်ယူနိုင်လိမ့်မယ်လို့ ယုံကြည်ရပါတယ်။

Leave a Comment